من أنا؟
سؤال صعب لا أعتقد أن له إجابة يمكن لملمتها في سطور.
لكن ربما هناك إجابة قد يحبها البعض:
سارة عبدالمنعم محمد النجار، وُلدت لأسرة مصرية عام 1981، وتخرجت في كلية الطب جامعة عين شمس عام 2004.
درست في مجال الطب النفسي وأنهيت دراساتي العليا بالمجال، والتحقت بمدارس علاجية عدة، ثم بدأت دراسة التحليل النفسي في الرابطة بمقرها في فرنسا:L’Espace Freudien International - Les Yeux de Parole
وكان لكل محطة في هذه الرحلة أثر كبير على حياتي الإنسانية والمهنية. أعمل اليوم طبيبة ولدي عيادة بالقاهرة الكبرى، وأنا أيضًا كاتبة صدر لها ثلاثة كتب تجدهم هنا.
- وُلدت
- 1981، لأسرة مصرية
- تخرجت
- كلية الطب، جامعة عين شمس، 2004
- التخصص
- الطب النفسي
- أم
- أدهم وريماس
- العيادة
- القاهرة الكبرى
أما إجابة السؤال «من أنا» الحقيقية،
فما أعرفه أنني لست ما درست، ولا ما أعمله، ولا الكتب التي كتبتها، ولا الأشياء التي يعرفها الناس عني.
هناك أشياء أخرى، صغيرة وكبيرة صنعتني؛ أشياء أحبها، وأشياء أخافها، أحلام لا زالت قيد التحقيق، وأسئلة ما زلت أبحث عن إجابات لها.
بل لأصدقك القول، أنا لا زلت أتعرف على ذاتي. لكن الخبر اللطيف هو أنه باستطاعتي مشاركتك بعضًا من إجاباتي؛ كنت منذ أيام ألعب مع أصدقائي، وطلبوا مني أن أجيب عن أسئلتهم إجابات سريعة دون تردد ودون تفكير.
أعرف أنه ربما لا تكفي بعض الإجابات لتعرف إنسانًا تمامًا، لكنها قد تكون بداية جيدة لأن تلتقي به.
يالا يا سارة، من غير تفكير جاوبي:
متى يكون الحب حقيقيًا؟
حين لا يكون نابعًا من جوع عاطفي وعطش نفسي، حين يكون كل طرف من الطرفين إنسانًا قادرًا على إسعاد نفسه، آمنًا في الحياة، مرتاحًا مع هويته؛ عندها فقط يكون المحبوب ذاته هو موضع الحب، وليس جوعي لأي علاقة أو عطشي لأي محبوب، والسلام.
متى يصبح الحب مؤذيًا؟
الحب نفسه عمره ما بيكون مؤذي. المؤذي إنك تضحك على نفسك، وتسمي علاقة أنت مش عارف تكون فيها على طبيعتك، علاقة تؤثر على صحتك العقلية سلبًا، حبًا.
متى يكون الإنسان قويًا؟
الإنسان عنده قدر كبير من القوة، ربنا خلقه أصلًا عنده طاقات وإمكانيات هائلة، جواه معجزات رهيبة. ما ينفعش يكون جوانا كل المعجزات دي، ويكون الإله كرمنا وميزنا بنعمة العقل، ونتخيل إننا مش أقوياء.
المهم الإنسان يكرّس جزءًا من وقته ومجهوده لاكتشاف هذه الطاقات.
متى يكون الإنسان حرًا؟
هو أصلًا حر، لكن لو تقصد متى يدرك الإنسان إنه هو حر؟
لما يعرف ربنا. لما يعرف ربنا بجد هيعرف إنه خلقه حر؛ حتى في إنه يختار إن الإله ده يكون ربه أو لأ، حتى ده هو حر فيه.
ده ولا ده؟
قهوة ولا شاي؟
قهوة (اختيارها)شايقهوة طبعًا.
بحر ولا جبل؟
بحر (اختيارها)جبلعلاقتي بالبحر علاقة فريدة جدًا، بحبه أوي بس بخاف من قلبته.
الصبح ولا الليل؟
الصبح (اختيارها)الليلالليل للنوم يا جماعة.
فستان ولا بنطلون؟
فستان (اختيارها)بنطلونكعب عالي ولا كوتشي؟
كعب (اختيارها)كوتشيلو سألتني من سنتين كنت قلت كوتشي. دلوقتي هقول كعب، بس مش عالي أوي، أنا أصلًا طويلة.
دهب ولا فضة؟
دهب (اختيارها)فضة (اختيارها)الاتنين.
قطط ولا كلاب؟
قطط (اختيارها)كلابلي لي 😍
فيلم في السينما ولا في البيت؟
السينماالبيت (اختيارها)قهوة في البيت ولا كافيه؟
البيتكافيهلو أختي اللي هتعملها، يبقى في البيت. لو أنا لوحدي، يبقى كافيه.
كتاب ورقي ولا Kindle؟
ورقيKindle (اختيارها)زمان كان ورقي. دلوقتي عندي دايمًا يوميًا أكتر من كتاب بقرأ فيهم بالتوازي: على الأغلب رواية، كتاب تحليل، كتاب شعر، وحاجات تانية كتير، وأكتر من مشروع كتابة، فأكيد كندل.
سفر لوحدك ولا مع حد بتحبيه؟
لوحديمع حد بحبه (اختيارها)ما بحبش أسافر لوحدي، مع إني بتبسط لوحدي عادي. بس في السفر بحب «الصخب والسهر والمغامرة والاكتشافات»، وده عكس طبيعة حياتي الهادية الرايقة، فأحب يكون معايا شخص أشاركه كل ده.
البيت مرتب جدًا ولا عادي بس مريح؟
مرتب جدًا (اختيارها)عادي بس مريحمرتب ونظيف جدًا جدًا. ده المريح، طالما مش أنا اللي بنظف.
حد يخطط لكِ يومك ولا تسيبيه يمشي لوحده؟
حد يخطط لييمشي لوحده (اختيارها)حد يخطط لي!! وأنا رحت فين. عندي روتين يومي، حتى لو باقي أوقات اليوم هتمشي من غير تخطيط.
هدية غالية ولا هدية مختارة بعناية؟
غاليةمختارة بعناية (اختيارها)هدية أنا اللي أختارها؛ مش مهم تكون غالية ولا سعرها معقول، لكن تسألني «عايزة إيه؟» وتجيبهولي. ده مفهوم الهدية عندي. إنما تشتري لي على ذوقك، هتتحول هداياك لكراكيب ملهاش عازة.
حاجات صغيرة
ما الشيء الصغير جدًا الذي يمكن أن يجعل يومك أفضل؟
كل حاجة. أنا بتلكك علشان أتبسط:
- نظرة ساذجة من لي لي، قطتي، وهي بتطارد شيء بفضول.
- بسمة شخص عابر.
- ضحكة بنتي.
- حضن من ابني.
- مكالمة من صديقتي بتقول «وحشتيني».
- صورة قديمة تجمعنا يرسلها أخويا.
- دعوة من ماما.
- إن فنجان القهوة يطلع مضبوط.
- إني أقرأ جملة تخليني أفكر مرتين.
ما أكثر شيء صغير يمكن أن يضايقك؟
القريبون مني عارفين إن التأخير يضايقني؛ إني أتأخر عن موعد أو أن يتأخر عليّ أحد، فترتبك كل مواعيدي. قد تبدو مسألة صغيرة، لكنها تضايقني جدًا.
ما أكثر شيء يظن الناس أنهم يعرفونه عنك، لكنه ليس صحيحًا؟
«إني شخص اجتماعي جريء، يستمتع بالأضواء وبيحب الكاميرا.»
الحقيقة أنا شخص هادي وخجول جدًا. بحب صحابي وأهلي والقريبين مني أوي وبشوفهم باستمرار. للأغراب أنا أبان شخص اجتماعي، لكن في الحقيقة أنا مش بتعود على الناس بسرعة، ومش سهل أكون صداقات، ومش برتاح مع الأضواء والكاميرات والصخب. ممكن تكون الكاميرا بتحبني، بس أنا مابعزهاش أوي.
عني أنا
لو هتعيشي أسبوع كامل على أكلة واحدة؟
أي نوع خضار. بحب الخضراوات بأنواعها جدًا، سواء مطبوخة أو من على الشجرة.
لون تفضلي شايفاه حواليكي طول الوقت؟
أزرق وأخضر.
ما الشيء الذي يمكن أن يجعلك تشعرين أنك في مكانك؟
كل الأماكن مكاني، طالما لا يوجد ما يسبب لي نفورًا.
ما الشيء الذي يمكن أن يجعلك تحبين شخصًا من أول مرة؟
إنه يكون حقيقيًا، على طبيعته. ومش معناها تلقائي، حتى لو شخص بيتكلم بحساب، بس المهم authentic and genuine.
ودي حاجة بتتحس، لكن ملهاش هيئة معينة، وأنا بعتمد على إحساسي وعمره ما خاب.
ما أكثر شيء يمكن أن يجعلك تنفرين من شخص؟
أي شخص مش مهتم بنظافته الشخصية، خاصة ريحته، وأي شخص صوته عالٍ.
هل هناك شيء لا تستطيعين مقاومته؟
يا خبر! البرفانات طبعًا.
إيه ممكن يخليكي تغيّري رأيك؟
سهل أغير رأيي. أنا مش شخص متعنت أو متصلب الرأي. بالمنطق بفكر مرتين وبغير رأيي عادي.
لو احتفظتِ بثلاثة أشياء فقط من حياتك كما هي الآن؟
لي لي تفضل صغيرة، ما تكبرش وتعجز.
كل الزرع في بيتي يفضل زي ما هو، عايش ومنتعش.
ولون دهان الحوائط عندي.
ما الشيء الذي تتمنين أن تعيشيه مرة أخرى؟
كل وقت كان بابا موجود فيه، باستثناء وقت مرضه.
ما الشيء الذي كنتِ تظنين أنكِ لن تتجاوزيه، لكنك تجاوزتيه بالفعل؟
علاقة عاطفية كنت فاكرة إن الشخص ده مستحيل ما يبقاش موجود في حياتي، ومبقاش موجود، ولسه بضحك وبتبسط وبجرب وبسافر من غيره. مابقاش موجود، لكن لما بفتكره «بتمناله الخير» بصوت أنغام، بكل سماحة وارتياح.
ما أكثر شيء تغيّر فيكِ مؤخرًا؟
أصبحت أقل تحمّلًا للأوضاع المزعجة. دي حاجة وصلت لها من قريب.
ما الشيء الذي لا يزال يدهشك في نفسك؟
إني لسه بحب المطبخ ولسه بطبخ، مع إني كل كام يوم أقول كفاية عليا كده، بقالي 21 سنة بطبخ.
ما الشيء الذي يغيّرك بشكل يومي أكثر مما تتوقعين؟
محبة صديقاتي، ودعمهم، وقبولهم، وجمالهم.
ما الشيء الذي ما زلتِ متمسكة به في نفسك حتى لو أزعج الآخرين؟
قوتي؛ كوني ست قوية ما تقبلش غير اللي تستحقه.
ما أكثر شيء اكتشفتِه عن نفسك بعد أن كبرتِ؟
إني جميلة. أقصد شكلي. بقيت بحب أشوفني، وبحمد ربنا على خلقه.
ماذا تتمنين أن يجد الإنسان في عالمك؛ أولادك، أصحابك، القارئ لكتبك، متابع، متعالج؟
يااه... السؤال ده صعب أوي، لكن لو من غير تفكير، أتمنى يلاقي الرسالة، المغزى من كل ده، The meaning، المعنى يعني.
أيوا هو المعنى.